Гэта першае спыненьне працы ўраду з часоў самага працяглага ў гісторыі. Амаль сем гадоў таму праца ўраду спынялася на 35 дзён. Цяпер так званы «шатдаўн» спыніць працу ў некалькіх фэдэральных ведамствах і агенцтвах, гэта закране сотні тысяч дзяржаўных службоўцаў, піша AFP.
Дональд Трамп вінаваціў дэмакратаў у застоі і пагражаў пакараць партыю і яе выбаршчыкаў у гэты пэрыяд атакай на «прагрэсіўныя» прыярытэты і паскарэньнем масавых скарачэньняў працоўных месцаў у дзяржаўным сэктары.
Трамп дадаў, што «з закрыцьця працы ўраду можа выйсьці шмат добрага», і выказаў здагадку, што выкарыстае паўзу, каб «пазбавіцца многіх рэчаў, якіх мы не хацелі, і гэта будуць дэмакратычныя рэчы».
Заведзены ў тупік Кангрэс рэгулярна сутыкаецца з пытаньнямі ўзгадненьня плянаў выдаткаў, і перамовы нязьменна напружаныя. Але Кангрэс звычайна пазьбягае іх, што прыводзіць да закрыцьця працы ўраду.
Дэмакраты, якія знаходзяцца ў меншасьці ў абедзьвюх палатах Кангрэсу, імкнуцца пашырыць свой рэдкі ўплыў на фэдэральны ўрад праз восем месяцаў пасьля пачатку другой прэзыдэнцкай кадэнцыі Трампа, у час якой былі зьліквідаваныя цэлыя дзяржаўныя ўстановы. Дэмакраты хацелі бачыць аднаўленьне выдаткаў на ахову здароўя ў памеры соцень мільярдаў даляраў, асабліва на праграму мэдыцынскага страхаваньня Obamacare для сем’яў зь нізкім узроўнем даходу, якую адміністрацыя Трампа, верагодна, зьліквідуе.
Пагроза Трампа новымі скарачэньнямі працоўных месцаў дадала трывогі фэдэральным службоўцам. Раней сёлета адбыліся маштабныя звальненьні, арганізаваныя Дэпартамэнтам эфэктыўнасьці ўраду, які тады ачольваў магнат Ілан Маск.
З 1976 году, калі Кангрэс увёў сучасны бюджэтны працэс, фэдэральны ўрад закрываў працу 21 раз. Некаторыя перапынкі ў працы доўжыліся ўсяго некалькі гадзін — недастаткова доўга, каб паўплываць на працу ўраду.
Самая працяглая паўза пачалася 22 сьнежня 2018 году, калі дэмакраты і Трамп апынуліся ў тупіку з-за 5,7 мільярда даляраў, якія прэзыдэнт патрабаваў на будаўніцтва сьцяны на мяжы ў час свайго першага тэрміну.
Каля 380 000 фэдэральных службоўцаў тады адправілі ў адпачынак, а яшчэ 420 000 працавалі без захаваньня заработнай платы.
Форум