Могілкі, мяркуючы па відэа тэлеканалу «Гродно Плюс», зноў моцна зарасьлі.
Валянтэры прыбіраюць парасьнік, які замінае аглядаць помнікі. Так стане зручней праводзіць экскурсіі, расказаў дзяржаўнаму выданьню начальнік Горадзенскай гарадзкой і раённай інспэкцыі прыродных рэсурсаў і аховы навакольнага асяродзьдзя Андрэй Пісанко.
Як часта будуць праводзіць такія прыборкі, не ўдакладняецца, піша hrodna.life.
Нэкропаляў на вуліцы Антонава два — Фарныя каталіцкія і больш позьнія, праваслаўныя могілкі. Каталіцкія былі закладзены ў 1792 годзе. Гэта найстарэйшы камунальны нэкропаль Беларусі. Абодва ня маюць афіцыйнага ахоўнага статусу. Абароненыя толькі асобныя надмагільныя помнікі.
Пры гэтым агулам на могілках на Антонава каля 8000 пахаваньняў, прыкладна тысяча — асабліва каштоўныя.
Многія пахаваньні канца ХІХ — пачатку ХХ стагодзьдзяў застаюцца без нагляду, бо ў жывых ужо няма сваякоў тых, хто тут пахаваны. Па сутнасьці, гэтыя магілы цяпер нікому не належаць.
Старыя могілкі ў Горадні маюць патрэбу ня толькі ў сыстэматычнай прыборцы, але і ў рэстаўрацыі, і захаваньні. Пра гэта некалькі гадоў казалі грамадзкія актывісты.
Яшчэ ў 2018 годзе мянчук Андрэй Бурдзенкаў пачаў праводзіць на тэрыторыі каталіцкага пахаваньня прыборкі помнікаў і алічбоўваць магілы. На гэта ён траціў свае грошы. Правёў некалькі валянтэрскіх талокаў, але людзей на іх прыходзіла мала. У нейкі момант яны спыніліся.
Экскурсаводы, якія шмат гадоў водзяць групы па могілках, адзначалі трывожную тэндэнцыю: з пахаваньняў зьнікаюць чыгунныя помнікі. Прычым часта гэта адбываецца паэтапна — спачатку крыж, потым калёна, затым тумба. У зямлі застаецца толькі аснова. Імаверна, помнікі разьбіраюць і здаюць на мэтал.
Летась увесну на каталіцкіх могілках упала адно з найстарэйшых надмагільляў, пастаўленае ў 1802 годзе, але старасьвецкую калёну падымаць не было каму.
Форум