Намесьніцы міністра параілі «дыхаць хрэнам». Гэта дапаможа?
Намесніца міністра аховы здароўя Беларусі Алена Богдан выступіла 12 сакавіка на дзяржаўным тэлеканале СТВ. У прысутнасьці Богдан СТВ паказала сюжэт пра рост цэнаў на імбір і лімоны на Камароўскім рынку. Вядоўца адзначыла, што ў намесьніцы міністра «даволі скептычная ўсьмешка была».
Богдан у адказ растлумачыла: «Яно ўсё добра, яно ўсё можа быць выкарыстанае, але ў дадатак да асноўнага лекаваньня захворваньня».
Намесьніца міністра адзначыла, што ў Беларусі ёсьць свае альтэрнатывы імбіру і лімону, як то журавіны або квашаная капуста, якія ўтрымліваюць шмат вітаміну С.
«Вельмі цікава, адзін з нашых спэцыялістаў прынёс мне слоічак хрэну і кажа: „Алена Леанідаўна, вы яго ня ежце. Вы ім дыхайце. І ён будзе абараняць вашыя лёгкія», — з усьмешкай расказала Богдан.
Ці дапаможа дыханьне хрэнам узмацніць імунітэт, яна не казала, але гэты спосаб згадала ў кантэксьце тых, якія могуць быць выкарыстаныя хіба «ў дадатак да асноўнага лекаваньня».
У Беларусі сабраліся адпускаць дамоў на самаізаляцыю хворых на COVID-19 у лёгкай форме
Намесніца міністра аховы здароўя Беларусі Алена Богдан выступіла 12 сакавіка на дзяржаўным тэлеканале СТВ.
«Я думаю, што ў бліжэйшы час мы зробім нарматыўны дакумэнт Міністэрства аховы здароўя, які дазволіць грамадзянам зь бессымптомным цячэньнем ці лёгкім цячэньнем каранавіруснай інфэкцыі пры ўмове магчымасьці поўнай самаізаляцыі знаходзіцца дома», — расказала Алена Богдан.
Такім чынам яна адказала на пытаньне пра магчымасьць самаізаляцыі пацыентаў з каранавірусам, аднесеных да «кантактаў першага ўзроўню», але ў ейным адказе гаворка ідзе пра лекаваньне дома ў залежнасьці ад цяжкасьці хваробы, а ня шляху атрыманьня вірусу.
Аляксандар Лукашэнка 7 красавіка згадваў, што падчас рэйду не знайшлі дома каля 400 чалавек — маўляў, правілы «можам узмацніць так, што ў вачах пацямнее». Тады ён казаў, што там, дзе «спрабавалі людзей замкнуць, нічога не атрымалася».
Да таго ён, разважаўшы пра самаізаляцыю здаровых, казаў: «Замыкаецца ў гэтых тухлых кватэрах — гэта не мэтад. Мы забіваем людзей у гэтых кватэрах».
«Лішні кантроль» не патрэбен. Качанава запэўніла, што ўлада ня ўтойвае ад беларусаў маштабы каранавірусу
Як заявіла старшыня Савету Рэспублікі Натальля Качанава, беларускай сыстэме аховы здароўя не патрэбен «лішні кантроль». Мэдыкі цудоўна ведаюць, што і як неабходна рабіць, адзначыла яна, дадаўшы, што ад грамадзян нічога ня ўтойваюць, а лічбы, якія даводзяцца, «абсалютна дакладныя і праўдзівыя».
У Беларусі цягам 8-11 красавіка працавала місія Сусьветнай арганізацыі здароўя (САЗ). Як акцэнтавала Натальля Качанава, Аляксандар Лукашэнка запрасіў экспэртаў, каб адкінуць сумневы ў пэўнай часткі грамадзтва з нагоды эфэктыўнасьці захадаў супраць каранавірусу, якія прымаюцца ў краіне.
«Яны казалі пра тое, што мы сапраўды адкрытыя і ўсё, што сёння робіцца ў краіне, заслугоўвае ўсялякай павагі. Экспэрты адзначылі сумленную, адкрытую, прыстойную працу айчынных мэдыкаў і выказалі пажаданьне, каб пра яе больш расказвалі простым беларусам», — сказала Качанава па выніках перамоваў з прадстаўнікамі місіі.
Лічбы на раніцу 13 красавіка
- У сьвеце зафіксавалі каля 1,85 мільёна выпадкаў COVID-19: 560 тысяч у ЗША, 166 тысяч у Гішпаніі, 156 тысяч у Італіі, 132 тысячы ў Францыі, каля 128 тысяч у Нямеччыне, 83 тысячы ў Кітаі, 84 тысячы ў Вялікай Брытаніі, звыш 71,5 тысячы ў Іране, каля 57 тысяч у Турэччыне.
- Ад хваробаў, якія выклікаў новы каранавірус, у сьвеце памерлі 114 253 чалавекі. Зь іх 22 115 у ЗША, 19 899 у Італіі, 17 209 у Гішпаніі, 14 393 у Францыі, 10 612 у Вялікай Брытаніі, 4474 у Іране, 3345 у Кітаі.
- Выпісалі 423,7 тысячы пацыентаў, якія ачунялі ад COVID-19. «Актыўных выпадкаў» хваробы застаецца больш за 1,3 млн, зь іх каля 50,9 тысячы ў цяжкім стане.
- У Беларусі, паводле афіцыйных зьвестак на 12 красавіка, пацьверджана 2578 выпадкаў COVID-19, памерлі 26 чалавек, прызнаныя здаровымі 203 пацыенты, за суткі выявілі 352 новыя выпадкі. Лекары ананімна заяўляюць, што ня ўсім хворым ставяць адпаведны дыягназ. Мінздароўя не залічвае ў памерлых ад COVID-19 тых, у каго вірус «элімінавалі», а яны ўсё роўна памерлі.
Каранавірус і алькаголь: як ня сьпіцца падчас карантыну
У Расеі ў апошні тыдзень сакавіка продажы віскі, гарэлкі і піва вырасьлі на 47%, 31% і 25% адпаведна — паводле дадзеных маркетынгавай кампаніі Nielsen, на якую спасылаецца Reuters. У ЗША прыкладна за той самы пэрыяд продажы алькагольнай
прадукцыі падскочылі на 55% у параўнаньні з тым самым пэрыядам летась.
Тая самая тэндэнцыя, паводле дадзеных Nielsen, адзначаная ў Брытаніі і ў Францыі.
Як мяркуюць экспэрты, павышаны попыт на алькаголь выкліканы карантынам, стрэсам, асьцярогамі, што ў крамах скончыцца выпіўка, а таксама памылковым уяўленьнем, што сьпіртное можа дапамагчы не заразіцца каранавіруснай інфэкцыяй. Пандэмія COVID-19, акрамя панічнага скупляньня прадметаў першай неабходнасьці, выклікала яшчэ адну нездаровую тэндэнцыю: амаль ва ўсіх краінах сьвету, дзе няма сухога закону, вырасьлі продажы алькаголю.
САЗ парэкамэндуе краінам беларускі падыход да лячэньня каранавірусу, — Каранік
Сусьветная арганізацыя аховы здароўя будзе рэкамэндаваць сумежным з Беларусьсю краінам беларускі пратакол лячэньня пацыентаў з пацьверджанай каранавіруснай інфэкцыяй, паведаміў міністар аховы здароўя Ўладзімір Каранік у эфіры тэлеканала АНТ, паведамляе БелТА.
«Калі мы абмеркавалі пратакол дыягностыкі і лячэньня пацыентаў з пацьверджанай каранавіруснай інфэкцыяй, яны сказалі, што ён не мае патрэбу ў нейкай карэкцыі. Акрамя таго, яны будуць яго рэкамэндаваць шматлікім сумежным краінам для ўкараненьня тых падыходаў, якія прымяняюцца ў нас па лячэньні гэтых пацыентаў», — сказаў Уладзімір Каранік.
Місія САЗ працавала ў Беларусі з 8 па 11 красавіка і прыбыла ў краіну на запрашэньне Аляксандра Лукашэнкі. Ацэньваліся сытуацыя, захады і падыходы да аказаньня мэдыцынскай дапамогі ў краіне.
Колькасьць ахвяраў каранавірусу ў Італіі за суткі стала самай нізкай ад 19 сакавіка
Колькасьць памерлых пацыентаў з каранавірусам за суткі ў Італіі склала 431 і стала самай нізкай ад 19 сакавіка. Такія дадзеныя, як паведамляе агенцтва Reuters, падаў у нядзелю Дэпартамэнт цывільнай абароны краіны.
Агульная колькасьць ахвяраў пандэміі ў Італіі дасягнула 19 899. Лік заражаных склаў 156 363 — на 4 092 больш, чым на дзень раней.
Адзначаецца, што цяпер 3 343 пацыенты з каранавірусам застаюцца ў аддзяленьнях інтэнсіўнай тэрапіі. Колькасьць вылечаных за суткі павялічылася да 34 211.
Вялікабрытанію можа чакаць самы змрочны ў Эўропе сцэнар эпідэміі
Экспэрты аднаго з найбуйнейшых дабрачынных фондаў сьвету лічаць, што менавіта Вялікабрытанія можа больш сур’ёзна, чым іншыя эўрапейскія краіны, пацярпець ад
каранавірусу. Ад COVID-19 там ужо памерла амаль 10 тысяч чалавек.
Вялікабрытанія можа стаць эўрапейскай краінай, якая найбольш сур’ёзна пацярпіць ад пандэміі каранавірусу. Так лічаць экспэрты аднаго з найбуйнейшых у сьвеце дабрачынных фондаў Wellcome Trust, які фінансуе мэдычна-біялягічныя дасьледаваньні. Пра гэта дырэктар фонду Джэрэмі Фарара заявіў у нядзелю, 12 красавіка, у інтэрвію мэдыякампаніі Бі-Бі-Сі.
«Практычна мы ня можам прадаваць віно». У Грузіі праз каранавірус запаволілася вінавытворчасьць
У Грузіі з прычыны пандэміі пачалі менш вырабляць віна. Адны прадпрыемствы скарачаюць вытворчасьць, іншыя — зусім спыняюцца. Рэпартаж Зьвіяда Мчэдлішвілі («Настоящее время»).
Георгі, уладальнік невялікай сямейнай вінаробні, за год вырабляе ад чатырох да пяці тысяч бутэлек віна некалькіх гатункаў. 70% прадукцыі экспартуецца ў Нямеччыну, Нідэрлянды, Чэхію і ЗША.
«Нядаўна да гэтага сьпісу дадалася Польшча. Але віно, якое было адпраўлена туды на экспарт, давялося фактычна з паўдарогі вяртаць назад. Гэта значыць, усё было гатова, дакумэнты былі ў парадку, але віно давялося вярнуць з прычыны цяперашняга крызісу ў сьвеце», — кажа Георгі Гвардзэлашвілі.
Паводле яго, большасьць грузінскіх малых вінаробняў прадаюць сваю прадукцыю пераважна за мяжу. А з пачаткам пашырэньня каранавірусу па сьвеце экспарт практычна спыніўся: большасьць пакупнікоў вырашылі перачакаць крызіс.
Борыса Джонсана выпісалі са шпіталя пасьля лячэньня ад COVID-19
Прэм’ер-міністар Вялікабрытаніі Борыс Джонсан выпісаны са шпіталя пасьля лячэньня ад каранавіруса COVID-19.
Пра гэта выданьню SkyNews заявіў прадстаўнік прэм’ера. Ён удакладніў, што Джонсан па патрабаваньні лекараў пакуль не вернецца да працы.
Борыс Джонсан лёг у шпіталь Сэнт-Томас у мінулую нядзелю ўвечары пасьля таго, як яго стан пагоршыўся. На наступны дзень яго перавялі ў рэанімацыю.
3,5 млн масквічоў не сядзелі ў «самаізаляцыі». Зараз будзе «прапускны рэжым»
Ад 15 красавіка ў Маскве ўводзяць «прапускны рэжым» — у расейскай сталіцы прыпыняюць працу некрытычных прадпрыемстваў і арганізацыяў, выдаюць адмысловыя пропускі для перасоўваньня па горадзе. Да таго, сьцьвярджаюць улады, шмат людзей не прытрымлівалася «хатняга рэжыму ізаляцыі».
Фармальна ў Маскве раней не абвяшчалі татальны карантын у сувязі з пандэміяй каранавірусу, але «рэжым хатняй ізаляцыі» быў абавязковым, а парушальнікаў штрафавалі.
Ды, як сьцьвярджае маскоўскі апэратыўны штаб барацьбы з каранавірусам, на 10 красавіка 3,5 млн чалавек выходзілі з дому на больш як 6 гадзінаў, і толькі 4,4 млн знаходзіліся дома. Паводле штабу, гэтыя 3,5 млн нясуць пагрозу заражэньня 6–9 млн сваіх сяброў і родных.
Зьвесткі сабралі праз аналітыку геалякацыі ад сотавых апэратараў. Колькі людзей агулам прааналізавалі, не ўдакладняецца. Але насельніцтва Масквы — каля 12,7 млн чалавек (паводле падлікаў «Росстат»), што значыць, што працяглы час не былі дома каля 27,6% масквічоў.
Сярод суседзяў Беларусі ў Літве цяпер найбольшы распаўсюд каранавірусу на душу насельніцтва
Статыстыка на 12 красавіка такая:
- Літва — 1053 выпадкі COVID-19, каля 387 выпадкаў на мільён жыхароў, памерлі 23 чалавекі;
- Латвія — 651 выпадак, каля 345 на мільён, памерлі 5;
- Беларусь — 2578 выпадкаў, каля 274 выпадкаў на мільён, памерлі 26;
- Польшча — 6356 выпадкаў, каля 168 на мільён, памерлі 208;
- Расея — 15 770 выпадкаў (і рэкордныя 2186 новых выпадкаў за адзін дзень), каля 108 на мільён, памерлі 130;
- Украіна — 2777 выпадкаў, каля 63 выпадкаў на мільён, памерлі 83.
Украіна застаецца на апошнім месцы ў Эўропе паводле выяўленых выпадкаў COVID-19 на душу насельніцтва, але там дзейнічаюць карантынныя захады, да 24 красавіка скасаваныя заняткі ва ўстановах адукацыі і масавыя мерапрыемствы. Як і ў Літве, выходзіць на вуліцу там не забараняюць.
У Вільні закрылі занадта папулярны парк сакуры
У Літве на 12 красавіка вядома пра 1053 выпадкі новага каранавірусу, ад COVID-19 памерлі 23 чалавекі. У краіне абвясьцілі карантын да 27 красавіка, але некаторыя яго парушаюць: зьбіраюцца больш як па два ў грамадзкіх месцах.
Адным з самых папулярных аказаўся парк сакуры, што на паўночным захадзе ад гістарычнага цэнтру Вільні. Намесьнік дырэктара адміністрацыі Вільні Адомас Бужынскас паведаміў 11 красавіка, што парк давядзецца закрыць.
Паводле яго, плыні людзей і транспарту ў Вільні штодзен адсочваюць і аналізуюць, у тым ліку з выкарыстаньнем бесьпілётнікаў Гэта дазволіла пазьбегнуць закрыцьця паркаў, бо людзі там выконвалі рэкамэндацыі аб дыстанцыянаваньні «і толькі ў выключных выпадках не рэагавалі на гукавыя папярэджаньні дронаў».
Ды парк сакураў кантраляваць не ўдавалася — ён надта вялікі, а «імкненьне рабіць сэлфі большае за нашыя высілкі», і «ні дроны, ні дзяжурныя афіцэры на месцы ня выцягнуць людзей адтуль».
Узбэкістан перадаў Беларусі груз дапамогі супраць каранавірусу
Ноччу 12 красавіка самалёт з Ташкенту даставіў у Менск груз з мэдычнымі маскамі, рэсьпіратарамі і камбэзамі, паведамляе дзяржаўны тэлеканал АНТ. Дапамогу выправілі на даручэньне кіраўніка Ўзбэкістану Шаўката Мірзіёева. Аб’ёмы дапамогі не ўдакладняюцца.
Ва Ўзбэкістане на момант публікацыі афіцыйна зарэгістравалі 796 выпадкаў новага каранавірусу і 4 сьмерці хворых на COVID-19. Цяпер там прызнана ў 11 разоў менш выпадкаў на душу насельніцтва, чым у Беларусі.
«Не хачу, каб яны заразіліся». Дзеці беларускіх мэдыкаў заклікалі заставацца дома
Youtube-канал Ірыны Ражко тыдзень таму публікаваў зварот беларускіх мэдыкаў, у якім яны прасілі падтрымкі: максымальна абмежаваць кантакты насіць маскі, пераканаць пажылых заставацца дома. Цяпер на канале зьявіўся зварот дзяцей мэдыкаў, якія просяць выконваць рэкамэндацыі, каб іхныя бацькі не заразіліся.
«Пахавалі ў закрытай труне». У Шуміліна першая сьмерць ад СOVID-19
Сын захварэлага Юрыя Магера Аляксандар паведаміў Свабодзе, што яго бацька памёр 10 красавіка. Пахаваньне адбылося 11 красавіка, хавалі Юрыя ў закрытай труне.
«Як бацька мог заразіцца, я ня ведаю, — расказвае сын памерлага. — Ён меў хворыя ныркі. І яго зь мясцовага шпіталя вазілі ў Віцебск на дыяліз, на мэдыцынскім аўтамабілі. Разам зь ім вазілі аналізы (хворых на каранавірус. — РС) ў Віцебск. Бацька асабліва нікуды не выходзіў з дому, ён меў інваліднасьць».
Аляксандар расказвае, што з бацькам бачыўся апошні раз 14 сакавіка. Яшчэ ў канцы сакавіка Юры Магер адчуваў сябе нармальна.
«Бацька нечым на дачы займаўся, працаваў, а ўвечары высокая тэмпэратура і яго адразу забралі, зрабілі аналіз, — працягвае Аляксандар. — Аналіз у маці таксама станоўчы, яна цяпер у шпіталі ў Шуміліна. Яе адразу ў Обаль вазілі, потым у Гарадок. У выніку назад у Шуміліна вярнулі. Мяне тады не было тут, я зьяжджаў у Расею. Калі бацька быў у шпіталі, мы размаўлялі па вайбэры. Ён такі чалавек, які заўсёды гаворыць, што ўсё нармальна, што ўсё добра».
Юрыю Магеру было 60 гадоў. Намесьніца старшыні Шумілінскага райвыканкама Ірына Шалахава, якая ўваходзіць у мясцовы штаб барацьбы з распаўсюдам эпідэміі, камэнтаваць першы выпадак сьмерці ў Шумілінскім раёне адмовілася.
Ужо 26 памерлых. У Беларусі прызналі 2578 выпадкаў COVID-19, плюс 352 выпадкі за дзень
Паводле міністэрства, на раніцу 12 красавіка ў Беларусі:
- 2578 выпадкаў каранавіруснай інфэкцыі зарэгістраваныя з пачатку эпідэміі;
- 50 зь іх маюць патрэбу ў штучнай вэнтыляцыі лёгкіх;
- 203 зь іх выздаравелі;
- 26 зь іх памерлі
- 352 новыя выпадкі зарэгістраваныя за дзень;
- «у большай часткі пацыентаў хвароба працякае ў лёгкай або сярэдняй форме»;
- ад пачатку эпідэміі зрабілі звыш 64 тысячаў тэстаў на каранавірусную інфэкцыю.
Днём раней Мінздароўя паведамляла пра 2226 выпадкаў каранавірусу, 172 ачунялых і 23 памерлых. 11 красавіка місія Сусьветнай арганізацыі здароўя на брыфінгу расказала пра вынікі вывучэньня сытуацыі ў Беларусі, заклікала да дадатковых захадаў дыстанцыянаваньня і да скасаваньня масавых мерапрыемстваў, а таксама да «падрыхтоўкі да найгоршых сцэнароў».
Каралева Брытаніі ўпершыню выступіла з пасланьнем на Вялікдзень: «Каранавірус нас не пераможа»
У звароце да нацыі 11 красавіка каралева Вялікай Брытаніі Елізавета ІІ зьвярнула ўвагу на сытуацыю з пандэміяй каранавірусу.
Каралева адзначыла, што для многіх Вялікдзень сёлета будзе не такім, як звычайна, але гэтая сьвята патрэбнае «як ніколі». Яна падкрэсьліла, што, «знаходзячыся на бясьпечнай дыстанцыі адзін ад аднаго, мы трымаем у бясьпецы іншых». Каранавірус, казала яна, не дазволіць адзначыць Вялікдзень разам, але няздольны адмяніць само сьвята.
Елізавета ІІ згадала традыцыю запальваць сьвечы на рэлігійныя сьвяты як знак перамогі сьвятла над цемрай. Традыцыя, казала яна, зразумелая любой культуры і апэлюе да людзей любой веры і бязь веры, яднае людзей.
«Хай жывое полымя надзеі на Вялікдзень будзе пастаянным правадніком у нашую будучыню», — сказала каралева брытанцам.
93-гадовая каралева запісвала аўдыёпасланьне ў адзіноце, з гукаінжынэрам у суседнім пакоі. Тыдзень таму яна зьвярталася да брытанцаў з тэлевізійным пасланьнем у сувязі з каранавірусам.
ЗША выйшлі на першае месца ў сьмерцях ад COVID-10. Ва ўсіх штатах рэжым «буйнога бедзтва»
У Злучаных Штатах колькасьць памерлых ад COVID-19 перавысіла 20 тысяч 11 красавіка — ЗША абагналі ў гэтым паказьніку Італію і выйшлі на першае месца ў сьвеце. Пры тым колькасьць інфікаваных і памерлых у ЗША пастаянна расьце, але колькасьць штодзённых новых выпадкаў стабілізавалася на ўзроўні 30–34 тысячаў, колькасьць штодзённых сьмерцяў ад каранавірусу — на ўзроўні каля 2 тысячаў.
Прэзыдэнт ЗША Дональд Трамп 11 красавіка зацьвердзіў дэклярацыю «буйнога бедзтва» для штату Ваёмінг — як адзначае CNBC, упершыню ў гісторыі ЗША ўсе штаты атрымалі такія дэклярацыі. Яны дазваляюць уладам штатаў атрымаць сродкі фэдэральнага ўраду на барацьбу з інфэкцыяй.
Таксама Трамп зацьвердзіў фінансаваньне цэлага комплексу захадаў для дапамогі Італіі, якая цяпер на трэцім месцы ў колькасьці інфікаваных і на другім паводле памерлых. Як піша «Голас Амэрыкі», падтрымка будзе аказаная ў тым ліку міжнародным і грамадзкім арганізацыям, многія з якіх ужо аказваюць дапамогу італьянцам, а вайскоўцы з ЗША дапамогуць італьянцам разгортваць палявыя шпіталі. Дзяржаўны сакратар Майк Пампэо адзначыў, што комплекс захадаў ня толькі дапаможа італьянскаму народу і аднаўленьню італьянскай эканомікі, але і падтрымае сусьветныя гандлёвыя і лягістычныя ланцугі.
«Цемра эпідэміі ахапіла зямлю». Мітрапаліт Кандрусевіч згадаў пра каранавірус у велікодным пасланьні
Да вернікаў з адмысловым пасланьнем зьвярнуўся старшыня Канфэрэнцыі каталіцкіх біскупаў Беларусі, мітрапаліт Мінска-Магілёўскі арцыбіскуп Тадэвуш Кандрусевіч. У звароце ён адзначыў, што Вялікдзень — гэта сьвята веры і надзеі на вечнае жыцьцё. А таксама згадаў пра пандэмію каранавірусу.
«Гэтая ісьціна. Пра яе мы, хрысьціяне, павінны заўсёды памятаць і ёю жыць. Яе актуальнасьць падкрэсьлівае таксама і выкліканая пандэміяй каранавірусу сытуацыя, у якой уваскрашэньне Хрыстова зьяўляецца промнем надзеі, нават насуперак надзеі. Як Ісус выйшаў з цёмнай магілы жывым, так і мы верым, што дзякуючы Богу, намаганьням лекараў і тых, хто нясе адказнасьць за грамадзкі парадак, якім мы бязьмерна ўдзячныя за іх ахвярнае служэньне, гэтак жа зможам пасьпяхова выйсьці з цемры эпідэміі, якая ахапіла зямлю, у сьвет жыцьця».