Паказьнік 2024 году азначае захаваньне кірунку на зьніжэньне спажываньня алькаголю пасьля дасягненьня піку ў 2021 годзе (тады сярэдні беларус выпіваў 12 л чыстага сьпірту за год). Цяперашні ўзровень піцьця вярнуўся да дзесяцігадовага мінімуму, які назіраўся ў 2016 годзе. Статыстыку прааналізавала газэта «Беларусы і рынак».
Больш за ўсё п’юць, паводле статыстыкі, у Магілёўскай вобласьці — у сярэднім 12,2 л чыстага сьпірту на чалавека. А ў суседняй зь ёй Гомельскай вобласьці паказьнік мінімальны — 10,6 л.
Найбольш чыстага сьпірту сярэдні беларус спажывае ў выглядзе гарэлкі і гарэлачных вырабаў (5,6 л), а таксама піва — 2,4 л.
Калі прасачыць на працягу 10 гадоў, якіх сьпіртных напояў беларусы сталі піць больш, а якіх — менш, то выявіцца, што ў натуральным выражэньні спажываньне гарэлкі вырасла. Цяпер у сярэднім на душу насельніцтва выпіваецца 12 літраў гарэлкі ў год, а ў 2015 годзе — было толькі 9,9 л.
Больш сталі піць піва: 51 літар супраць 42 дзесяць гадоў таму. Аднак самы імклівы рост паказалі слабаалькагольныя напоі (якія не ўключаюць у сябе ні піва, ні пладовае віно) — іх зараз сярэдні беларусы выпівае 5,4 літра ў год, тады як раней было менш за 1 л.
Пладовага віна беларусы п’юць усё яшчэ больш, чым вінаграднага, аднак за дзесяць гадоў яго спажываньне ўсё ж радыкальна зьнізілася: 4,6 л цяпер супраць 10 л у 2015 годзе.
ГЛЯДЗІЦЕ ТАКСАМА: Расейскія півавары прэтэндуюць на траціну беларускага рынку. Ці выціснуць яны беларускіх вытворцаў?