Менскі гарадзкі савет дэпутатаў ухваліў рашэньне аб прысваеньні вуліцы на тэрыторыі жылога комплексу «Паўночны бераг» імені старшага лейтэнанта Дзьмітрыя Федасюка, паведаміла дзяржаўнае агенцтва БелТА.
Федасюк загінуў у часе перастрэлкі пры спробе сілавікоў патрапіць у кватэру Андрэя Зельцара — праграміста, які загінуў, аказваючы збройны супраціў групе апэратыўнікаў КДБ падчас ператрусу ў ягонай кватэры ў Менску ў верасьні 2021 году.
Трагедыя 28 верасьня 2021 году — афіцыйная вэрсія падзеяў
Паводле афіцыйнай вэрсіі, Дзьмітры Федасюк загінуў 28 верасьня 2021 году падчас «спэцапэрацыі па выяўленьні і затрыманьні людзей, датычных да тэрарыстычнай дзейнасьці». Паведамлялі, што ў кватэры на вуліцы Якубоўскага па супрацоўніках праваахоўных органаў быў адкрыты агонь. Федасюк, як сьцьвярджаецца, кінуўся насустрач стрэлам, прыняўшы агонь на сябе і прыкрыўшы таварышаў. Ён быў сьмяротна паранены, але ў адказ зьліквідаваў нападніка — Андрэя Зельцара, які таксама загінуў у выніку перастрэлкі. За «адвагу, праяўленую пры выкананьні службовых абавязкаў», Аляксандар Лукашэнка пасьмяротна ўзнагародзіў Федасюка ордэнам «За асабістую мужнасьць».
ГЛЯДЗІЦЕ ТАКСАМА: «Два гады калёніі для чалавека ні за што — гэта мала?». Што новага ў затрыманых у «справе Зельцара»Вэрсія ByPol — Федасюка маглі сьмяротна параніць свае
Былыя сілавікі з ініцыятывы ByPol у сваім расьсьледаваньні сьцьвярджаюць: Федасюк мог загінуць ад кулі калегі. У відэа, якое распаўсюдзілі спэцслужбы, нібыта зьмяшаныя пастановачныя і рэальныя кадры, а гук стрэлаў — накладзены асобна. Згодна з вэрсіяй ByPol, Зельцара маглі зьліквідаваць, каб схаваць памылку, зробленую падчас штурму.
Акрамя таго, ByPol заяўляе, што сілавікі прыйшлі ў кватэру Зельцара не па яго, а па брата ягонай жонкі, які быў прапісаны ў кватэры і выклаў у Instagram відэа атакі на базу АМАПу.
Жонку Зельцара Марыю Ўсьпенскую абвінавацілі ў саўдзеле ў забойстве і адправілі на прымусовае лячэньне ў псыхіятрычны стацыянар.
І Федасюку, і Зельцару быў 31 год.
ГЛЯДЗІЦЕ ТАКСАМА: «Ён плача, калі па вечарах разглядае здымкі». Сямёра дзяцей чакаюць дадому тату, які сядзіць у «справе Зэльцара»